| fimmtudagurinn 4. október 2012

Opinn fundur um mögulega mannréttindastofnun

Innanríkisráðuneytið stendur fyrir opnum morgunverðarfundi um hvort að ráðast eigi í að stofna sjálfstæða mannréttindastofnun á Íslandi næstkomandi fimmtudag, 4. október frá kl. 8.30-11 í Iðnó í Reykjavík. Umfangsmikil vinna fer nú fram á vegum stjórnvalda í tengslum við mótun landsáætlunar í mannréttindum sem á m.a. að bregðast við athugasemdum SÞ um mannréttindamál á Íslandi.

 

Íslensk stjórnvöld hafa fengið athugasemdir og tilmæli á grundvelli flestra þeirra mannréttindasamninga sem Ísland er aðili að um að hér sé ekki starfandi sjálfstæð mannréttindastofnun í samræmi við svokölluð Parísarviðmið. Í reglubundnu allsherjareftirliti með mannréttindaskuldbindingum (UPR) sem fram fór á vettvangi mannréttindaráðs Sameinuðu þjóðanna síðastliðið haust hétu stjórnvöld því að kanna rækilega hvort ráðast skyldi í að koma á laggirnar stofnun í samræmi við athugasemdir alþjóðlegra eftirlitsaðila.

Þetta er  sjöundi og næstsíðasti fundur í röð ráðuneytisins um mannréttindamál sem haldnir hafa verið í tengslum við mótun landsáætlunar í mannréttindum. Fundurinn er öllum opinn og aðgangur er ókeypis. Með fundaröðinni er leitast við að fá sem flesta til að taka þátt í stefnumótun í málaflokknum til að hún eigi sér ekki aðeins stað innan veggja ráðuneyta heldur í samstarfi og í beinum tengslum við hagsmunaaðila, fræðasamfélag og almenning.

Dagskrá í Iðnó 4. október 2012 kl. 8.30 til 11

  • Ögmundur Jónasson innanríkisráðherra ávarpar fundinn

Erindi flytja:

  • Oddný Mjöll Arnardóttir, lektor við lagadeild Háskóla Íslands
  • Tryggvi Gunnarsson, umboðsmaður Alþingis
  • Margrét Steinarsdóttir, framkvæmdastjóri Mannréttindaskrifstofu Íslands

Að erindum loknum gefst tími til almennrar umræðu og fyrirspurna.

Vefumsjón