Niðurstöður málþings um flutning þjónustu við fatlaða frá ríki til sveitarfélaga

Samband íslenskra sveitarfélaga, samgönguráðuneytið og félags- og tryggingamálaráðuneytið stóðu að málþingi um flutning þjónustu við fatlaða frá ríki til sveitarfélaga miðvikudaginn 20. maí 2009. Fundarstaður var Hilton Hótel Nordica og málþingið stóð frá kl. 10.00 til 15.30.
Markmið málþingsins var að leiða saman faghópa, sveitarstjórnarmenn, aðra hagsmunaaðila og áhugafólk um þjónustu við fatlaða og félagsþjónustu almennt og skapa vettvang til skoðanaskipta um framkvæmd tilfærslu á þjónustu við fatlaða frá ríki til sveitarfélaga í samræmi við viljayfirlýsingu aðila frá 13. mars 2009. Vel tókst að ná til markhópanna og var málþingið var fjölsótt, 225 manns skráðu sig til leiks.

Málþingið hófst með stuttum ávörpum samgönguráðherra, Kristjáns L. Möller, og félags- og tryggingamálaráðherra, Árna Páls Árnasonar. Sigurður Helgason, ráðgjafi verkefnisstjórnar, flutti almenna kynningu á stöðu verkefnisins. Málþinginu lauk með stuttri samantekt og pallborðsumræðu.

Þungamiðja málþingsins var starf í fimm málstofum. Hér á eftir eru teknir saman helstu punktar sem fram komu í umræðum í einstökum málstofum. Í samantektinni er lögð áhersla á að tíunda þau atriði sem verkefnisstjórnin þarf að hafa í huga við samningagerð milli ríkis og sveitarfélaga og við gerð áætlunar um framkvæmd yfirfærslunnar.

Erindi og aðrar niðurstöður má sjá á vefsíðu Félagsmálaráðuneytisins á slóðinni: http://www.felagsmalaraduneyti.is/radstefnur/nr/4407