| þriðjudagurinn 6. nóvember 2012

Kynbundinn launamunur meiri hjá ríki en sveitarfélögum

Samkvæmt kjarakönnun BSRB er kynbundinn launamunur nokkuð meiri hjá ríkinu en sveitarfélögum. Kynbundinn launamunur á heildarlaunum félagsmanna BSRB mælist 14,8% hjá þeim sem starfa hjá ríkinu en 10,2% hjá þeim sem fá laun sín greidd frá sveitarfélögum. 

 

Við frekari greiningu sést að launamunurinn er enn meiri þegar heildarlaun félagsmanna á höfuðborgarsvæðinu eru borin saman við þeirra á landsbyggðinni. Kynbundinn launamunur starfsmanna ríkisins á höfuðborgarsvæðinu mælist 14,1% en 8,4% hjá starfsmönnum sveitarfélaganna á sama landssvæði.

Á landsbyggðinni mælist kynbundinn launamunur á meðal félagsmanna BSRB sem þiggja laun sín frá ríkinu 18,7% en 16,2% hjá þeim sem starfa hjá sveitarfélögunum úti á landi. Frekari upplýsingar um kynbundinn launamun á milli landsbyggðar og höfuðborgarsvæðis eftir því hvort viðkomandi félagsmenn starfa hjá ríki eða sveitarfélagi má sjá hér. Í þessu skjali má svo sjá kynbundinn launamun á landinu öllu eftir því hvort launagreiðandinn er ríki eða sveitarfélag.

 

Vefumsjón